FEATURE

「買勞(ROLEX),點解有新唔買,要買舊勞呢?」The Vintage Concept店長Albert Leung這樣說,「以前後生不明白,其實好簡單,因為保值!市場需求大,多人玩,情況同買金一樣。」玩Vintage ROLEX是一條不歸路,香港「中錶毒」的人甚多,賣出買入是必經之路,沿途多番的一見鍾情,令玩家一次又一次割捨昔日所愛,換取今天眼中的最愛,這種永無止境的追求,就像男女關係,只要你認為值得,即使散盡家當,依然心甘命抵!

玩Vintage ROLEX易中錶毒,誓要舊勞陪葬

何年何月出產的ROLEX才可稱得上Vintage?對於懷舊的定義,玩勞的人各有說法,事關連ROLEX也從來沒有官方資料作出界定。「上世紀80至90年代的不算懷舊,只是中古,要至少有幾十年日子的,大概上世紀60至70年代吧,才算Vintage!」The Vintage Concept店長Albert這樣說,玩勞長達二十多年,自言曾經「中錶毒」,為了心儀的錶款「瞓晒身」,「廿幾年前擁有第一隻後,就不停跟錶友相聚,交換情報,後來自己背型號錶面,買好多日本懷舊錶書睇,再大膽一點入錶舖睇錶,終於有一日買到了,開心到難以形容,當時覺得(手錶)緊要過老婆,瞓覺都要戴住!打工仔,賺有限錢,最多Keep到7至8隻錶,單靠買入賣出換取心頭好,總有舊愛需要犧牲。「想當年,其實就好似時下年輕人玩波鞋,今日好想買,但唔夠錢,除了碌卡,就是賣掉手頭上的貨去換新歡,一旦遲咗被人買走,或者無奈為了開飯而割愛,個心都會好唔高興,會好掛住隻錶。」說到這裡,Albert心痛之情溢於言表。玩舊勞,如他所說,好比一段段男女關係,有人相信一見鍾情,有人覺得要從朋友開始,慢慢了解才決定走在一起。「有些客人就是這樣,不是沒有錢,即使望落幾合眼緣,都要成日落來睇下、摸下隻錶,話要同隻錶聯絡感情,從不同角度欣賞隻錶的瑕疵。」未知塵世間有多少天荒地老的愛情故事,但Albert說真的有人對Vintage ROLEX終始不渝:「有部份客人玩得好激情,聲稱要打爛晒(舊勞)陪他走,問題佢又點知自己幾時死呢?這類人玩錶不是為了圖利,所以死都不願放手。」不求陪葬,但求同歸於盡,不是真愛是甚麼呢?

初入門宜隨波逐流,鬥長命是法則

玩Vintage ROLEX,就是戀上那份懷舊味道,每一隻錶都有它記載的故事,輾轉間來到你手上,命中註定由你延續它的風霜。Albert說:「對我來說,錶是有生命的,你戴上它才會動,如果你盲目跟風,即好似人地買狗你又養來玩玩,一味只為轉售圖利,是享受不了玩舊撈的箇中樂趣。」如果你決定入門,首先要肯定不要半途而廢,不懂從何入手也沒關係,最緊要心目中有一定的預算。「平時好多客入來,我都會問他們大概預幾多錢?如果有萬多二萬元,退一步買斯文舊勞吧,比較化算;如果你付出6萬至8萬,甚至10萬,我會推介具一定升值潛力的運動款。」Albert說部份後生仔未玩過,潮流吹起玩舊勞,覺得有型又保值,只靠上網看討論區,最後決定「買咗先算」,往往出現「放埋一邊」的結果,「戴戴吓先發覺不適合自己,唯有四圍去facebook、Instagram放錶,或者跑勻全港九新界Check價,最後還是決定來到我這裡放錶。」人人都說買勞好處是保值,但玩得Vintage勞,最好有心理準備跟它「鬥長命」,多從錶書學習,跟錶友相聚交換情報,「切忌同人鬥貴,明明已經戴住隻70年代潛水錶,人地走入來勁過你,無必要咁,又唔係武林大會!記住一點,所有舊勞並不是100蚊買入,100蚊賣返出去,基本上拎得返7至8成錢已經好好,就好似買樓買車,叫做有啲嘢揸起手。」

發哥華仔一早識玩,重口味為大忌

如何提升收藏價值?「事實上Vintage ROLEX來來去去比較搶手都係20款之內,儲齊出世紙、配件、錨、說明書,另外還有目錄及Service Paper(泛指勞力士服務中心所發出的維修發票收據),當然係最好,但太執著隻錶係咪同年份出世,爭少少都唔要就好難搞,一隻錶過咗幾十年,唔通你戴錶會帶埋佢張出世紙出街咩,其實多張紙,只係幫助你日後鋪條路好價一點,可能多一、兩萬元。」其實保值的最好方法,是維持手錶的質素,尤其是錶盤,Albert說切忌玩得太重口味 :「以前防水冇咁好,但隔咗一段日子,錶面或有水氣,或受潮影響,一撻撻的,像蜂巢般,由白變黃,由黃變綠,有人鍾意覺得咁先有story;有些錶面因為氧化而有一堆墨,但我喜歡均勻一點,望落要舒服。」所以太重口味是比較難合眼緣,他提醒各位錶友,避免錶面受潮,抹油不需要太頻密,時間不是過份偏差就不要修服,手錶拆一次就傷一次,原裝就是最好的。

世界各地玩都有人玩舊勞,香港不少玩勞錶友都是向日本仔取經,「無計,日本人早就洞悉先機,時裝、設計、家品等等如是,玩舊勞的人一定曾拜讀日本的錶書,飛日本蒲上野、中野尋寶。」Albert說香港早年的星級玩家有周潤發、劉德華、沈嘉偉、藤原浩,近年就有郭富城、張智霖、余文樂等,統統都是型人代表,「香港買賣舊撈的店10隻手指數得晒!」當中名氣最大的是The Vintage Concept,網羅大部份熱門及罕有錶款,明星熟客不在話下,訪問當日就有不少「非富則貴」的中外客人前來找Albert改裝手錶:「除了維修保養,悶悶地不妨轉玩錶帶,公司有多款顏色、質地的尼龍或皮帶,全部意大利入口,帶點Vintage味道,改裝後就不但能凸顯用家個性,襯衫又好睇,而且不容易撞款。」

訪問日為年廿九,下午三時半,不少中年男士在店內進進出出,有些索性打躉吹水,除了交換情報和玩錶心得,感覺就像老友相聚,嘻嘻哈哈,悠閒自在,跟店外忙碌的中環上班族構成強烈對比。Albert笑說:「玩舊勞,情況同女人買Hermès差不多!臨近年尾,節日前會特別多人買新裝錶,因為多宴會嘛,要威吓,新年過後就會唔少人來放錶。」果然有錢就是任性。正如他最後的寄語,有錢人當它是彰顯品味的收藏玩意,平民目的很簡單,一為裝身,二為圖利,心態各有不同,實力亦難以相比,就算多合眼緣,都要「睇餸食飯」,量力而為。

  • Text : Abby Lo
  • Photo : Benson Yip & Keith Au
  • Graphic Design : Justin Li
  • Video : Sue Li
  • Special Thanks : THE VINTAGE CONCEPT / 2522 2301