INSIDERS

空服之旅 — 第八章「一個人的中秋」

2 months ago

中秋節快樂!今個中秋又要一個人喺外站過,連續幾個節日嘅正日都要喺外站過,不過食得鹹魚抵得渴,做得呢份工就預左會係咁,紅日唔一定有得放,好彩嘅咪有得放,唔好彩嘅, 喺外站放啦。開心嘅係,公司竟然喺中秋節正日嘅航班派月餅。好難得因航會咁有心呀,仲記得去年聖誕,連一個聖誕掛飾喺飛機上面都搵唔到,但中秋節竟然派比乘客一人一個美心月餅,我見好多乘客都食得好開心同好驚喜!

為左令自己喺中秋節過得開心啲,雖然自己一個人過,但都要帶埋月餅返工,喺酒店食月餅,望下光,感受下節日嘅氣氛。今次要加拿大溫哥華留四日,其實當地都好有節日氣氛,因為溫哥華實在有好多香港人同中國人移民過去或者喺呢邊讀書,基本上你會見到好多亞洲人嘅面孔,特別係飲食同零售業,好多都係識講廣東話同普通話。其實個人覺得加拿大嘅茶餐廳好食過香港果啲,雖然價錢比香港貴,但大碟好多同埋有誠意好多,重點係,侍應嘅服務態度都好好多。

唔知大家有冇黎過加拿大呢,又或者有冇聽過 Tim Hortons ?Tim Hortons 係一間類似大家成日幫襯嘅 Starbucks,但佢嘅headquarter都係喺 Canada,可以話係當地人成日去買咖啡同食早餐嘅好去處。而我都一樣,每次去親加拿大都會去幫襯,喺寒冷嘅冬天,一杯熱 Caffè Mocha 係手上絕對少不免。

童心未泯嘅我,對呢一種三小食 TiMBiTS 情有獨鍾,佢細細粒,你可以一口食晒,又可以咬開去慢慢食,一樣咁好味。佢一啲都唔貴,今次我買左最細盒嘅十粒裝,加埋稅都只係加紙2.89,計番做港紙都係大約十七蚊,超好味!大家下次去加拿大可以試下,你仲可以揀你想食嘅味道,花心嘅我梗係每種味都想要啲啦!佢仲有分三種數量比你揀,十粒,廿粒同五十粒。一家大細食,其實五十粒都好快食得晒,但我呢啲小毒毒,都係買一盒十粒裝嘅算啦。

立即按Like,追蹤STYLE-TIPS.COM 每天facebook更新!

related news