INSIDERS

空服之旅 — 第九章「特別餐」

8 months ago

點解我冇得揀?我唔食牛!我食齋!呢啲說話同對答,幾乎每一班機都會聽到,有時仲會搞到要見經艙客務經理,又話要投訴。你估,你想食乜,我都變到出黎比你咩?飛機冇廚房架。

話想小弟早排有班由香港飛三藩市嘅機,一如以往,香港飛三藩市總係有好多印度客轉機,由印度飛香港再飛三藩市,每班機少則廿個,多則過百都係基本,我算好彩,最多都試過只係九十幾,我聽過有同事話一百七十幾,佔左成架飛機人數一半有多。而印度客人通常都係會同印度餐、印度素食餐等等,有時大家都會聞到,佢地食嘅餐味度比較濃,有啲人會覺得啲咖哩味好香,有啲人會覺得…係嘅,對我黎講,我唔會揀。哈哈!

正常情況下,喺派正常餐之前,我地會先派晒所有有訂特別餐比客人先,所以有時你地會見到我地點解唔係用餐車去派,係逐個逐個餐拎住行出去派比啲客人,唔係因為個客係尊貴客戶,只係訂左特別餐嘅客人,我地會先派比佢地,再出餐車派正常餐。大部分呢啲印度客人通常都搭慣搭熟,買飛果陣已經訂埋食特別餐。

喺長途機上面,我地會派兩餐,喺經濟艙,其中有一餐我地會提供三個選擇,通常一個中式,一個西式,再加一個素食餐,素食餐通常都係以PASTA會主,例如蕃茄醬意粉,蘑菇汁長通粉。因為入面係冇肉,通常都比較不受歡迎,但呢個選擇其實係為左冇訂素食餐嘅人比佢地揀。但可惜嘅係,食完呢餐下一餐只會得兩個選擇,係呢兩個選擇,係冇揀食餐嘅選擇。喺呢個時候,好多冇訂特別餐嘅人,佢地第一餐食完素食餐,呢一餐冇素食餐,佢地就會黎料,投訴「點解我冇得揀?」「我食齋架!」

介紹番,其實每間航空公司都會提供好多唔同種類嘅特別餐比大家揀,喺我所屬嘅公司係超過二十種比你揀,你只要係每飛嘅時候有一項係問你需唔需要訂特別餐,又或者你經旅行社訂,你可以叫佢幫你搞埋,又或者喺飛機起飛前廿四小時打去航空公司熱線訂都可以。有時你冇訂到,但你上到機唔肯食,我地真係變唔到你,比到你嘅可能都係咁岩上到多左,上錯左,又或者又客人訂到但唔食,又或者訂左嘅客人no show on board ,咁先有機會比到你,但如果你冇禮貌嘅,我諗冇大家唔會幫你「諗辦法」啦。

立即按Like,追蹤STYLE-TIPS.COM 每天facebook更新!

related news