INSIDERS

「魔性」再現摩連奴 能否繼續領風騷?

1 month ago

「站在球場內,就如沒氧氣」曼聯教練摩連奴第三季一啲都唔易過,開季滿途荊棘,球隊曾經歷4場不勝,真係想大啖呼同吸一口氣都困難。不過,凡事總有高山與低谷,上週末曼聯魔性澎湃地反勝紐卡素,莫非沉睡中嘅紅魔鬼終於睡醒?今集我會同大家講下究竟什麼原因令曼聯上仗重拾魔性。

曼聯球員馬斯亞(A. Martial)

1. 神級調動

成績與結果往往都可以凌駕一切,當球隊贏波有好成績,凡事都風調雨順;反之,當球隊輸波無成績,凡事都變成問題。對陣紐卡素比賽頭10分鐘連失兩球,正當摩佬心諗「幾多人位於山之巔俯瞰我的疲倦」,佢無氣餒亦無放棄,18分鐘因戰術關係果斷地把馬達換入拜耶,陣式上由4-3-3轉為4-2-3-1,麥湯文尼移後為中堅,華舒福由右翼移入中路,成為中場與盧卡古嘅橋樑。球隊一直在串連性存在問題,盧卡古前場孤立無援,但今場明顯地變陣後成功牽制對方中場,繼而利用邊路傳中球製造攻門機會。孤注一擲嘅調動,反而盡顯摩佬「狂人」本色,力證自己仍然係 The Special One!對我而言,4-2-3-1陣式的確係曼聯現時最佳出路,即使戰術守舊,只係利用兩邊製造傳中球,但只要有最好效果,能夠有好成績,又何樂而不為。正如俗語所講:「橋唔怕舊,最緊要受。」

(紅)拜利(E. Bailly);摩連奴(J. Mourinho)

2. 勝利的渴望

要贏一場比賽,當然要入波多過對手,即使贏盡數據但欠缺入球,都係徒勞無功。曼聯上下半場最大分野係球員對勝利及入球慾望,從以下(圖一、圖二)所見,就係最大啟示。呢個畫面係咪似曾相識呢(圖三)?費格遜年代嘅紅魔鬼其中一個最強武器就係傳中球,除咗傳中球落點準繩,參與進攻人數勝在夠多,係禁區入面進攻球員平均分佈於近柱、中間、遠柱及12碼點附近位置進行搶點及執「Second Ball」。或許呢種求勝心態,就係普巴所講嘅進攻,進攻,再進攻;又或者係曼迷一直奇待嘅進取型踢法。即使呢種踢法消耗好多體力,但「努力做人誰怕氣喘」,只要能夠為球隊帶來好成績,就係正確嘅方法。

曼聯對紐卡素上半場傳中球情況(圖一)
曼聯對紐卡素下半場傳中球情況(圖二)
2007年曼聯對愛華頓傳中球情況(圖三)

3. 球迷

你贏,我陪你君臨天下;你輸,我陪你東山再起!真球迷係不論何時何地何年何月何日,都會支持同守護愛隊。雖然每個球迷都有不同意見,但如果去到攻擊球隊成員,如問責制般把問題放大「區分到太清楚,未免太嚴苛」,或會帶來一定反效果。奥脫福球場週六重現「夢劇院」本色,係球迷不停打氣同呼喊之下,球隊下半場表現脫胎換骨,連入三球反勝紐卡素。近年「夢劇院」的確失色不少,由以往聲勢浩大猶如變得雷聲小雨點小,主場強勁嘅勝利歷史記錄不斷被打破,再唔係令人畏懼無比嘅主場。

曼聯球迷

曼聯,就係與勝利掛鉤。球員用雙腳製造出嘅輝煌歷史,係永遠唔能夠改變。經歷接近四年多嘅低谷,上至老闆下至球迷都「渴望大團圓,但腳下路程難以削短」,紅魔鬼要重振雄風確實仍有一段距離,但信念始終不可改變,這一天指日可待。

17/18 球季 - 曼聯

立即按Like,追蹤STYLE-TIPS.COM 每天facebook更新!

related news